जादूटोणाविरोधी कायदा लागू

बहुचर्चित जादूटोणाविरोधी कायद्याचा चौदा वर्षांचा "वनवास' आज अखेर संपला. राज्यपाल के. शंकरनारायणन यांनी राज्य सरकारने काढलेल्या मसुद्यावर सही करत या कायद्याचा अध्यादेश जारी केला. यामुळे, राज्यात आजपासून जादूटोणाविरोधी कायदा लागू झाला आहे. 

डॉ. नरेंद्र दाभोलकर यांच्या हत्येनंतर दुसऱ्याच दिवशी, म्हणजे ता. 21 ऑगस्टला राज्य मंत्रिमंडळाने प्रलंबित जादूटोणाविरोधी अध्यादेश काढला होता. राज्यपाल के. शंकरनारायणन यांच्याकडे हा अध्यादेश पाठवल्यानंतर आज सायंकाळी त्यांनी त्यावर स्वाक्षरी केली. राज्यपालांनी स्वाक्षरी केल्याने या अध्यादेशाचे तात्पुरत्या स्वरूपात कायद्यात रूपांतर झाले आहे. त्यामुळे, राज्य सरकारला पुढील सहा महिन्यांत या अध्यादेशाचे विधेयक विधिमंडळात मंजूर करावे लागेल. नागपूर येथे होणाऱ्या आगामी हिवाळी अधिवेशनात हा अध्यादेश विधेयकाच्या रूपाने दोन्ही सभागृहांत मंजूर करून घेण्याचे आव्हान राज्य सरकारसमोर आहे. 

राज्यपालांनी जादूटोणाविरोधी कायद्याचा अध्यादेश जारी केल्याने राज्यात आजपासूनच भूत-भुताटकी, चेटूक उतरविण्याच्या नावाखाली व्यक्‍तीला मारहाण करणे, काठी अथवा चाबकाने मारणे, पादत्राणे भिजवलेले पाणी पिण्यास देणे, मिरचीची धुरी देणे, छताला टांगणे, दोर अथवा केसांनी बांधणे, केस उपटणे, चटके देणे या अमानुष कृत्यांवर बंदी आली आहे. असे कृत्य करणाऱ्यांना या अध्यादेशाच्या आधारे तुरुंगात जावे लागणार हे नक्‍की झाले आहे. 

हे ठरणार आजपासून गुन्हा... 
- तथाकथित चमत्काराचा प्रयोग करून अर्थप्राप्ती करणे, लोकांना फसवणे, ठकवणे आणि दहशत बसवणे. 
- अलौकिक शक्‍तीची कृपा व्हावी यासाठी जिवाला धोका निर्माण होईल असे कृत्य करणे, शरीराला जखमा करणे. 
- मौल्यवान वस्तू, गुप्तधन आणि जलस्रोत शोधण्याच्या बहाण्याने करणी, भानामती नावाने अघोरी कृत्य करणे. 
- जारणमारण यांच्या नावाने नरबळी देणे, अथवा प्रयत्न करणे. 
- शरीरात अतींद्रिय शक्‍ती असल्याचे भासवून इतर व्यक्‍तींच्या मनात भीती निर्माण करणे. 
- एखादी व्यक्‍ती करणी, जादूटोणा करते, भूत लावते, मंत्रतंत्राने जनावरांचे दूध आटवते, असे सांगून संशय निर्माण करणे. 
- चेटूक केल्याच्या नावाखाली एखाद्या व्यक्‍तीला मारहाण करणे, नग्नावस्थेत धिंड काढणे. 
- भूत-पिशाच्चांना आवाहन करीन, अशी धमकी देऊन जनतेच्या मनात घबराट निर्माण करणे. 
- कुत्रा, साप किंवा विंचू चावल्यास उपचारांपासून रोखणे, प्रतिबंध करणे. त्याऐवजी मंत्रतंत्र, गंडेदोरे बांधणे. 
- विकलांग व्यक्‍तीमध्ये अलौकिक शक्‍ती असल्याचे भासवून तिचा वापर धंदा, व्यवसायासाठी करणे.

तेरी मेरी यारी... सुपरहिट दुनियादारी...

झी टॉकीजच्या ‘दुनियादारी’ या चित्रपटानं मराठी चित्रपट सृष्टीच्या इतिहासात एक नवा विक्रम रचला आहे . केवळ महाराष्ट्रातच नव्हे तर आजपासून ‘दुनियादारी’चे तब्बल ७१० शो राज्यासह गोवा, गुजरात आणि कर्नाटकातही झळकणार आहेत. विशेष म्हणजे झी टॉकीजची प्रस्तुती असलेल्या या सिनेमाची नोंद ‘टॉप 10 मुव्हीज इन इंडिया इन करंट वीक’च्या यादीत झाली आहे. या यादीत हा सिनेमा पहिल्या स्थानावर आहे.


कॉलेजमधील मित्र-मैत्रिणी, कॉलेजमध्ये जुळलेले नंतर अपयशी ठरलेले प्रेम, कॉलेजच्या आठवणी, मित्रांची भंकस या सगळ्या आठवणी प्रत्येकाने मनात जपलेल्या असतात. कॉलेज कट्टय़ावर केलेला टाइमपास, मारामाऱ्या, फालतूची खुन्नस, ठसन, मैत्रिणी, मित्रांची दिलदारी याचा अनुभव 'दुनियादारी' हा चित्रपट देतो. सुहास शिरवळकर यांची गाजलेली कादंबरी 'रेट्रो लूक'मध्ये देखण्या रूपात दिग्दर्शकाने चित्रपटात मांडली आहे. आजच्या तरुणाईबरोबरच सर्वच प्रेक्षकांना कॉलेजच्या दिवसांची आठवण करून देणारा हा देखणा चित्रपट मैत्रीचे महत्त्व अधोरेखित करतो. मध्यांतरानंतर काहीसा संथपणे सरकणारा हा चित्रपट आयुष्याचे अनेक रंग दाखवत छान मनोरंजन करतो.

हा चित्रपट दिग्दर्शकाच्या मनात खूप काळापासून घर करून राहिलेला चित्रपट असल्याचे त्याने जाहीर केल्यानंतर अतिशय गाजलेल्या अशा कादंबरीवरील या चित्रपटाबाबत निर्माण झालेल्या अपेक्षा पूर्ण करण्यात दिग्दर्शक यशस्वी ठरतो. प्रेक्षकांनी अगोदरच वाचलेल्या गोष्टीतील परिचित व्यक्तिरेखा पडद्यावर मांडण्याचे आव्हान दिग्दर्शकाने पेलले आहे. सत्तरच्या दशकाच्या उत्तरार्धात अमिताभचा करिष्मा अनुभवणाऱ्या प्रेक्षकाला त्या काळातील कॉलेज युवकांचे कपडे, बेलबॉटम फॅशन कशी होती याची मस्त झलक चित्रपटात झकास दाखवली आहे.

डीएसपी असो की सॉरी, शिरीन असो की मीनाक्षी सगळ्याच व्यक्तिरेखांची ओळख प्रेक्षकाला करून देण्याची दिग्दर्शकाची पद्धत प्रेक्षकाची दाद मिळवणारी आहे. मध्यांतरापर्यंत सर्व प्रमुख व्यक्तिरेखांची ओळख, कट्टा गँगची धमाल, मीनूला पटविण्यासाठी लढविलेली शक्कल, व्यक्तिरेखांचे स्वभाव यामुळे धमाल येते. मध्यांतरानंतर चित्रपट भावभावनांचे गहिरे रंग दाखविण्याकडे वळतो. चित्रपटाचे असे दोन भाग पडतात. तरीही डीएसपी-सुरेखा यांचे लग्न होणार की नाही, मवाली डीएसपी चांगला माणूस बनण्यासाठी प्रयत्न करणार की नाही. श्रेयसच्या प्रेमात पडलेली मीनू आणि शिरीनच्या प्रेमात पडलेला श्रेयस यांच्यापैकी श्रेयस कुणाशी लग्न करणार अशी सगळ्या कोडय़ांची उकल दिग्दर्शकाने परिणामकारकरीत्या दाखवली आहे.

आजच्या तरुणाईबरोबरच सर्वच प्रेक्षकांचे नवरसपूर्ण मनोरंजन करणारा असा हा चित्रपट आहे. डीएसपीची 'तेरी मेरी यारी..' असो की नेहमी चुकीची माहिती देणारा 'सॉरी' असो, मेव्हणे-मेव्हणे मेव्हण्यांचे पाव्हणे म्हणणारा साई असो, गद्दारी करणारा अश्क्या असो सर्वच व्यक्तिरेखांच्या वैशिष्टय़पूर्ण शैली, लकबी आणि सर्वच कलावंतांचा अभिनय यामुळे चित्रपट खुलतो, प्रेक्षकाला भावतो.
अमिताभच्या स्टाईलचा आपल्या व्यक्तिरेखेसाठी अंकुश चौधरीने केलेला योग्य वापर, 'बच्चू' ही प्रतिमा ठसवणारा भोळाभाबडा स्वप्निल जोशीचा अभिनय, शिरीनच्या व्यक्तिरेखेला असलेल्या छटा अभिनयातून नीटपणे दाखवण्याचा सई ताम्हणकरने केलेला प्रयत्न याला दाद द्यायला हवी.

दुनियादारी 
निर्माता - ड्रीमिंग ट्वेन्टी फोर सेव्हन
दिग्दर्शक - संजय जाधव
मूळ कादंबरी- सुहास शिरवळकर
पटकथा व संवाद - चिन्मय मांडलेकर
छायालेखक - प्रसाद भेंडे
संगीत - समीर साप्तीसकर, पंकज, अमितराज
गीते - मंदार चोळकर, सचिन पाठक
संकलन - आशीष म्हात्रे, अपूर्वा मोतीवाले
कला दिग्दर्शन - महेश साळगावकर
कलावंत - स्वप्निल जोशी, अंकुश चौधरी, सई ताम्हणकर, उर्मिला कानेटकर, जीतेंद्र जोशी, रिचा परियाली, सुशांत शेलार, अजिंक्य जोशी, राजेश भोसले, प्रणव रावराणे, योगेश शिरसाट, अमित बेंद्रे, वर्षां उसगावकर, उदय टिकेकर, संदीप कुलकर्णी, उदय सबनीस, नागेश भोसले